I sonetti composti, in Romanesco, da Carlo Alberto Salustri, sotto lo pseudonimo di Trilussa, a cominciare dal 1890, in una produzione che si è conclusa nel 1950, con la sua morte; sono un ritratto dell’umanità di quegli anni, con quei personaggi coloriti, precisi e diligenti che conservano sia le mollezze che le sofferenze del periodo.
   Il loro ruolo, comunemente umoristico o satirico, concede a Trilussa di essere un poeta ironico e sentimentale, al tempo stesso. Sovente, egli ricorre alla favola esiodica per definire i caratteri umani, traendoli fuori di continuo, indiscutibilmente.
   La compiacente sonorità dei versi romaneschi si combina assai bene alla cadenza del Ventemigliusu, tanto che è sufficiente adeguare i termini e le glosse, negli inevitabili differenti modi d’esprimersi, per ottenere rime scorrevoli e coerenti.

I SETE PECAI
 I sette vizi capitali

          A LIBERTÀ
                       La libertà
.
- Cos'à l’è a Libertà ?  Avù t’u spiegu:
- dixeva Menepigliu a Menefregu -
A libertà d’in populu a l’è cumpagna
a l’aiga ch’a ven zü da ina muntagna.
Se ti a lasci passà duv’a vö andà,
a se sciurica inta scciümaira e u ma’:
ma se gh’é chi la’ ghida e u l’arredüxe
e u l’incanařa zü versu l’üxina,
cum’a l’arriva a smöve ina türbina
a vegne forsa e a se trasfurma in lüxe -.
.
- Bela scüverta !  Grassie d’u cunsegliu !
- responde Menefregu a Menepigliu -
Ma candu l’aiga a l’à smuvüu, in camin,
ina çentrale eletrica o in müřin,
s’à canta o s’à mungugna nu’ l’é ma’
lasciàghe in po’ de sfögu versu u ma’-.

              A PUIRA
                           La paura
.
- Sun curagiusu e forte !
- dixe in Cavalu au Mü - e vagu in campu
ben cin de fede e léstu cum’in lampu,
tütu cuntentu de desfià a morte !
.
Se arriva caiche bàla ch’a m’amassa
sagrifegu a mei vita vurrenté
pe’ fa’ sci’ in modu de cunservà a rassa.
.
- Acapisciu, - à ditu u Mü -
Ma, de lì là, mì aiscì, següru,
candu de fronte au periculu recülu,
a modu mei, nu’ l’amantegnu a rassa ?

           U  SPAVENTU
                         Lo spavento
.
In Ratu traspurtau int’in desertu
drentu u bagagliu d’ina caruvana,
a mezanöte u l’è sciortiu a l’auvertu:
ma ina sciumbria, sciortia d’int’ina tana,
a l’à faitu suspeità d’esse scüvertu.
.
- Chi va’ la’ ? - u ghe fa’ u Ratu.   Ditu faitu
gh’è staitu in rüzimentu: - Sun u Leun.
Co’ ti ressauti a fa’ ?    Ti vegni matu ?
- Uh ! - u ghe fa’ u Ratu - scüsa l’emusciun,
ma sai, ti me sei aparesciüu in gatu.

L'UNESTÀ D'A MAIREGRANDA
                         L'onestà di mia nonna
.
              Me’ mairegrande a l’à pigliau mariu.
              Ma a nu’ l’à faitu miga cume tante
              che dopu pocu i gh’àva za’ l’amante ...
              Pe’ çincant’ani, a nu’ l’à mai tradiu !
.
              Ma, pa’ che in giurnu, in veciu ben despostu,
              ch’u ghe vurreva fa’ da spasimante,
              u gh’àge ditu: - Ve dagu ‘stu brilante,
              se vegniré a pigliaveřa int’in postu.
.
              In’autra, au postu sou, pö acapità,
              a gh’avereva ditu: - Mì sun prunta. -
              Ma a mairegrande a nu’ gh’é miga andà;
.
              maiciü, ... a gh’à ditu: - Stévene luntan ...
              Tantu che avura, cand'a l’è che â conta
              ancu’, ... sustrandu, a se ghe morde a man !

              I VECI
                       I vecchi
.
Çerti Craveti i gh’àn ditu a in Cravun:
- Che bele corna !   I nu’ se sun mai viste !
Perché i te sun cresciüe a turtigliun ?
- ‘St’afaire chi dapöi u saverè
- u gh’à ditu u Cravun - Se Diu u v’assiste,
da grandi ... becchi, aiscì vui u vegniré -.

L'AUTUMOBILE E A SOUMÉTA
                   L'automobile e la somara
.
- Rutadecolu ! - a Soumeta a gh’à rüsau
int'u ve’ in’Autumobile a benzina
- Duve ti passi tü nasce in maixélu !
Ti ài desbielàu in can, ina gaglina,
in porcu, ina papura, in pulastru ...
Povere bestie ! ... Che carnefeixina !
Che burdelu ti fai ! ... Rutadecolu !
 
- Nu’ parlà tantu, murru de mumìna !
- gh'a respundüu füriusa l’Autumobile -
Se ve’ che a purve e u sbrüfu
d’u stantüfu i t’àn in po’ imbalurdiu !
Nu’ ti sai che candu curru gh’òn a forsa
de çentu e ciü cavali ? ... E co’ ti increi
che chi vö fa’ carriera u se fa’ scrüpulu
de cheli ch’u s’atröva in mezu a pei ?
Mì curru e me ne gratu, e fa’ nu’ lasciu
che ina bestiassa ignobile, ti vei,
a s’azarde a mancame de respeitu !
.
E int'u di’ ‘ste parole l’Autumobile
cuscì tantu cařù a l'à atissau
che u muture, ingurfàu, u gh’é scciupàu.
Alura a scangia ton. A dixe: - E avura ?
Chi m’arrebelerà fina au depoxitu ?
Oh ! Amiga mei, ti capiti a prupoxitu,
ti a pöi sarvà ... tü sula a sitüasciùn ...
.
- Vegnu - a gh’à ditu l’Ase - e me cunsula
che çentu e ciü cavali a l’ucaxiun
i l’àn besögnu d’ina Souma sula !

Ciàche föglia ch’a möira o ch’a se perda
a rénde a vita a in’autra föglia verda.